जागतिक रक्तदाता दिनानिमित्त बीड जिल्हा रुग्णालयात जनजागृतीचा संदेश

“मानवतेचा एक थेंब… रक्तदान करा, जीवन वाचवा” – नियमित रक्तदानाचा संकल्प करण्याचे आवाहन

बीड / प्रतिनिधी
जागतिक रक्तदाता दिनानिमित्त (14 जून 2026) बीड जिल्हा रुग्णालयात उत्साहपूर्ण व जनजागृतीपर वातावरणात विविध कार्यक्रमांचे आयोजन करण्यात आले. समाजात स्वेच्छा रक्तदानाबाबत जागरूकता निर्माण करण्याच्या उद्देशाने आयोजित या कार्यक्रमाला नागरिकांचा उत्स्फूर्त प्रतिसाद लाभला.
यावेळी मा. जिल्हाधिकारी IAS, मा. दिव्यांग गुप्ता (प्रोबेशन अधिकारी), मा. सिव्हिल सर्जन तसेच मा. अपर सिव्हिल सर्जन यांच्या प्रमुख उपस्थितीत रक्तदानाचे सामाजिक, मानवी आणि आरोग्यविषयक महत्त्व अधोरेखित करण्यात आले. उपस्थित मान्यवरांनी रक्तदान हे केवळ एक वैद्यकीय कार्य नसून मानवतेची खरी सेवा असल्याचे सांगत नागरिकांना नियमित रक्तदान करण्याचे आवाहन केले.
यंदाच्या जागतिक रक्तदाता दिनाची संकल्पना “मानवतेचा एक थेंब… रक्तदान करा, जीवन वाचवा” ही असून, रक्तदानाद्वारे गरजू रुग्णांना नवजीवन देण्याचा संदेश देण्यात आला. अपघातग्रस्त, शस्त्रक्रिया रुग्ण, थॅलेसेमिया व इतर गंभीर आजारांनी ग्रस्त रुग्णांसाठी रक्ताचा प्रत्येक थेंब अमूल्य ठरत असल्याचे यावेळी सांगण्यात आले.
मानवतेच्या भावनेतून केलेले रक्तदान हे समाजातील एकता, करुणा आणि सामूहिक जबाबदारीचे प्रतीक आहे. एका व्यक्तीच्या रक्तदानामुळे अनेकांचे प्राण वाचू शकतात आणि त्यांच्या कुटुंबात आनंदाचे क्षण परत येऊ शकतात. त्यामुळे प्रत्येक सक्षम नागरिकाने नियमित आणि स्वेच्छेने रक्तदान करण्याचा संकल्प करणे ही काळाची गरज असल्याचे मत मान्यवरांनी व्यक्त केले.
रक्तदानाविषयी असलेल्या गैरसमजुती दूर करून अधिकाधिक युवकांनी या चळवळीत सहभागी व्हावे, असे आवाहनही यावेळी करण्यात आले.

रक्तदान हेच श्रेष्ठ दान!
आपल्या एका थेंबातून अनेकांचे जीवन फुलू शकते; चला, रक्तदान करून मानवतेची साखळी अधिक मजबूत करूया.